ROXAS CITY – Ginkompirmar ni City Mayor Ronnie Dadivas nga indi sini pagpunggan ang pagpauli sang mga Locally Stranded Individuals ukon LSI’s sa siyudad sang Roxas.
Ini ang pahayag sang amo nga alkalde sang mainterview sang Bombo Radyo.
Suno kay Dadivas nga padayon sa gihapon nga magabaton ang lokal nga gobyerno sang siyudad sang mga LSI’s nga magapauli subong nga bulan sang paskwa.
Ini bangud ginalaoman na sini nga madamo sang mga LSI’s ang magapauli sa siyudad subong nga nagahilapit na ang adlaw sang paskwa.
Apang, ginpahayag ni Dadivas nga kinahanglan lamang nga mag-comply ang mga LSI’s kag ROF’s sang mga rekisitos kag magsunod sa mga nagakaigo nga mga minimum health standars.
Mahibaluan nga madamo sang mga LSI’s ang naga-request sang Letter of Acceptance sa City Government.
Wala man ini problema suno sa alkalde bangud may yara na sang kaugalingon nga RT-PCR Test Laboratory ang siyudad.
Sa pihak sini, naghatag naman sang pahayag ang alkalde may kaangtanan sa implementasyon sang Sanitary Landfill sa Barangay San Jose sining siyudad matapos nga nakabaton sang notice of violation ang city government.
Suno kay Dadivas nga ginatinguhaan pa sini nga maproseso ang mga dokumento angut diri kag ginaistoryahan naman nila ini sang konseho.
Apang, ginpahayag sang alkalde nga kinahanglan lamang ang disiplina sang tagsa ka mga barangay sa paghaboy sang mga basura.
Samtang nagpasalig naman ang amo nga alkalde nga pagahatagan ini sang solusyon sang city government.
