ROXAS CITY – Nabutang sa kontrobersiya ang City Social Welfare and Development Office matapos nagreklamo ang isa ka senior citizen sa natukiban nga iregularidad sa ginkuha nga social amelioration program (SAP) form nga una ginfil-apan sa pagdumdum nga maka-avail sa cash assistance sang gobyerno.
Nagdangup sa Bombo Radyo si Margarita Andrada sang Barangay Punta Tabuc, sining syudad matapos nakita sa back portion sang SAC form nga ginkuha sa CSWDO nga may yara na ini sang thumb mark kag may nagklamar na sang amo nga ayuda.
Ginkatingala ini sang ginang bangud wala ini nagbutang sang thumb mark sa pormas, matapos nga ginhambalan sang nag-cater sa iya nga empleyado sang talatapan nga indi siya kwalipikado bangud retiree ini kag GSIS pensioner.
Wala na lamang ini nagpamilit kag ginrespeto ang pagsulundan nga ginasiling sang ahensiya.
Nagka-interes lamang ang ginang nga kuhaon ang SAC form matapos nahibaluan nga kun gin-deny ang aplikasyon dapat nga kuhaon ang pormas nga ginfil-apan.
Gintuad pa ni Andrada nga madamo pa sang nangin alibi ang mga empleyado sang CSWDO sang ila ginakuha ang dokumento apang sang ulihi, ginhatag man matapos nakita nga desidido ang tagreklamo nga makuha ang pormas.
Sa pagtsekyar sang ginang ginkakibot sini sang nakita nga may thumb mark na ang pormas kag nabaton ang P6,000 nga ayuda sang gobyerno.
Ginapanindugan sang ginang nga wala ini nakabaton sang cash assistance bangud wala sini matapos fill-up ang SAC form sang nahibaluan nga indi kwalipikado sa amo nga bulig
Samtang suportado naman ni Jose Roman Andrada ang nangin pahayag sang iloy sa diin ginkumpirma sini nga madamo pa sang pamangkot ang mga empleyado sang CSWD sang nagpadulong ini sa talatapan para kuhaon ang nasambit nga pormas.
Gintuad pa sini nga kasubong indi pa kuntani pag-ihatag ang SAC form nga iya ginakuha, apang ginpanindugan sini nga indi siya maghalin sa talatapan kun indi makuha ang dokumento nga ginapakuha sang iloy.
