ROXAS CITY – Ginkaalarma sang City Social Welfare Development office ang padayon nga pagsaka sang numero sang kaso sang paghikog ukon suicide sa siyudad sang Roxas subongman sa probinsya sang Capiz.
Suno kay Lorelie Suelo sang Roxas City Crisis Center nga kinahanglan batunon na lamang ang realidad sa pagpangabuhi sa baylo nga utason ang kaugalingon nga kabuhi.
Ginpahayag ni Suelo nga dako man ang papel sang pagtamdanay sang isa ka pamilya sa isa kag isa.
Nagakadapat man nga bantayan sang mga ginikanan ang ila tagsa ka mga kabataan kag hatagan sang madamo nga atensyon bangud isa ini ka epektibo nga pamaagi agud malikawan ang suicidal thoughts sa mga kabataan.
Magluwas diri, importante man ang pagpangamuyo sa Ginuo agud mas mahibaluan ang importansya sa pagpangabuhi.
Dugang pa ni Suelo nga indi magpaapekto sa tanan nga bagay partikular na sa mga kabataan nga tuman ka sensitibo ang mga balatyagon.
Subongman, indi magpaapekto sa mga nagakalatabo sa social media subong nga panahon ilabi na subong nga COVID19 pandemic.
