ROXAS CITY – Wala pa nakapatigayon sang pagpangbakuna sa anti-rabies ang City Veterinarian office bangud nagahulat pa sila sang vaccine nga pagabaklon sang City government kag nagahulat man sang veterinarian nga igapahamtang agud mag-supervise sa pagpangbakuna.
Ini ang ginpahayag ni Mary Ann Barria, City Agriculturist kag OIC sang City Veterinarian office sang ma-interview sang Bombo Radyo.
Aminado man si Barria nga madamo sang dog owners ang nagahulat nga mag-abot ang bakuna para sa anti-rabies.
Sa datos sang City Veterinarian office, may napagkit sila nga duwa ka kaso sang ginkagat sang ido kag ini ang sa Brgy. Culasi kag Brgy. Gabuan.
Padayon naman ang monitoring sang nasambit nga opisina sa mga ido kag dog owners. Ginsiguro man sini nga kun mag-abot na ang ginbakal nga bakuna para sa anti-rabies magapadulong sila sa kada barangay agud maghiwat sang vaccination sa mga ido.
