ROXAS CITY – Ginpatpat sang pamunuan sang City Veterinarian’s Office ang pila ka mga rason nga indi pa mahimo magamit ang dogpound sang gobyerno sang siyudad sa Barangay Dinginan, Roxas City.
Suno kay City Veterinarian Dr. Roberto Dante Corros, apisar yara na ang amo nga pasilidad, wala gihapon diri sang linya sang kuryente, septic tank kag iban pa rason nga indi pa ini pwede maggamit.
Ginpahayag sini nga may yara naman siya sang proposed budget para sa repair, rehabilitation kag completion sang amo nga pasilidad.
Ang ginaduso sini nga pondo ang nagalab-ot sa 3 milyones pesos kun sa diin diri naman pagakuhaon ang pondo para sa salakyan nga gamiton sa pag-impound sang mga ido.
Samtang ginpahayag man ni Corros may pila ka mga pagbag-o ukon amendments sa Ordinance No. 12-2013 para masabat ang problema sa pagnilapta sang mga layaw nga ido sa siyudad.
Kalakip diri ang pagpasaka sang mga penalidad sa mga violators kag pag-kuha sang obaryo ukon pagkapon sa mga ido nga makapila ka beses na nga na-impound.
