Civil Aeronautics Board, ipabilin sa Level 4 ang fuel surcharge sa bulan sang Oktubre

Ipabilin sang Civil Aeronautics Board (CAB) sa level 4 ang fuel surcharges nga ila ipatuman sa bulan sang Oktubre .

Suno sa CAB, ang tikang amo ang pagsiguro sang kalig-on sang operasyon sang eroplano sa pihak sang wala pat-od nga pagsaka-panaog sang presyo sang gatong sa bug-os nga kalibutan.

Ini na ang ikatlo nga sunod-sunod nga bulan nga ginpatuman sang CAB ang level 4 fuel surcharges.

Para sa Level 4, ang mga pasahero nga nagabiyahe lamang sa sulod sang Pilipinas ang magabayad sang P117 tubtub P342 kada pasahero depende sa kalayuon sang biyahe.

Samtang ang mga international flights ang magabayad halin P85.70 tubtub P2,867.82 kada pasahero.

Ang nasambit nga kantidad ginakwenta kada fuel consumption sang isa ka flight.