ROXAS CITY – Liwat nga magapatigayon ang Civil Service Commission sang examination sa Hunyo 19 matapos ang duwa ka tuig nga pagka-postponed sang CSC exam tuga sang Covid-19 pandemic.
Ini ang ginpahayag ni Mr. Rufino Leonoras, Director sang Civil Service Commission Field Office – Capiz sang ma-interview sang Bombo Radyo Roxas.
Ginpatpat man sini ang mga rekisitos nga kinahanglanon sang mga luyag magkuha sang exam.Suno kay Leonoras, ang fully vaccinated nga mga examinee kag exam administrators ang indi na kinahanglan magpaidalom sa RT-PCR test ukon antigen testing.
Apang, kinahanglan nga magpakita sang vaccination card bilang pamatuod nga nakakompleto na sang pagpabakuna.
Gina-required naman ang mga partially vaccinated ukon wala nakapabakuna nga examinee nga magpaidalom sa RT-PCR test ukon antigen test nga nahimo 3 tubtob 5 ka adlaw antes ang examination.
Gintuad man sini, nga sa adlaw sang examination, gina-required sa mga examinee nga magpakita sang health declaration form, certificate of consent kag vaccination card.
Ang venue sang examination sa Hunyo 19, ang career service professional exam ang pagahiwaton sa Capiz National High School samtang ang career service sub-professional ang pagahiwaton sa Congressman Ramon A. Arnaldo National High School.
Gin-anunsyo man sini ang petsa sa filing period para sa pen and paper test 2022 nga maga-umpisa na sa Hunyo 2 tubtob Hunyo 16 apang pagahiwaton ini sa Agosto 7 subong nga tuig.
