Ginalauman nga magabulos bilang bag-o nga Miss Grand International 2024 ang Pinay beauty queen nga si CJ Opiaza matapos nga ginkakas ang titleholder nga si Rachel Gupta sang India bangud sa ginpahayag kapaslawan sini nga tumanon ang iya papel bilang reigning queen.
Sa online post sang organisasyon sini nga Miyerkules, ginkumpirmar sini nga ang pagtapos sang titulo ni Rachel Gupta bilang MGI 2024 “epektibo gilayon”. Ang amo nga desisyon ginhimo pagkatapos nga gin-alegar nga napaslawan sia sa paghimo sang iya mga katungdanan, nag-engage sa mga proyekto sa guwa nga wala sing pahanugot gikan sa organisasyon kag nagpamalibad sa pag-upod sa natalana nga pagbiyahe pakadto sa Guatemala.
Suno sa organisasyon sang MGI, ginhingyo sini sa Indian beauty queen nga ibalik sa ila ang korona sa sulod sang 30 ka adlaw.
Para kay Gupta, ginkumpirmar niya ang iya paghalin bilang MGI 2024 sa iya Instagram post. Ang Indian beauty queen nagpabutyag man sang iya pagkadismaya, nga nagasiling nga ang iya pagpanglakaton bilang MGI 2024 nangin mabudlay bangod sang mga ginlapas nga mga saad, indi maayo nga pagtratar, kag isa ka makahililo nga palibot nga indi na niya maagwanta.
Nagpangabay sia sang kaluoy, bukas nga tagipusuon, kag padayon nga suporta sa iya masunod nga mga tikang kag nagsiling nga magapaguwa sia sang bug-os nga video nga nagadetalye sang istorya sa likod sang iya “difficult journey”.
Matandaan, nga si Gupta amo ang una nga beauty queen gikan sa India nga nagdaug sang amo nga internasyonal nga titulo sa grand coronation night nga ginhiwat sa Bangkok, Thailand sang Oktubre 2024.
Ginkoronahan ang Philippine contestant nga si Christine Juliane Opiaza nga first runner-up, nga ginalauman nga magabulos kay Gupta kasunod sang desisyon sang organisasyon sang MGI.
Ini ang mangin una nga MGI crown sang Pilipinas kon mapilian si Opiaza bilang bag-o nga titleholder.
