ROXAS CITY – Nagapadayon ang clearing operations sa mga sidewalk vendors sa bug-os nga syudad sang Roxas kadungan sang ginpaguwa nga ordinansa sang city government.
Sa interview sang Bombo Radyo kay Mrs. Heloise Mendoza, Market Administrator sang Teodoro Arcenas Trade Center suno diri, sunod nga padulungan sang ila grupo amu ang TATC kag Barangay VIII kag pagakakason ang mga iligal nga structure nga nagatuga sang istorbo sa ilig sang trapiko.
Aminado man si Mendoza nga disorganized pa ang estado sang merkado publiko bangud sa nagapadayon nga construction sang redevelopment sang city government.
Apang, pagatinguhaan gid ini nga masolusyonan agud indi makaistorbo sa mga salakyan sa dalanon.
Nagapanawagan man ini sa mga manugbaligya nga naapektuhan sang clearing operation nga magpalapit sa iya agud mahatagan sang maayo nga puwesto sa sulod sang merkado publiko.
