ROXAS CITY – Padayon ang pagpatigayon sang pila ka ahensya sang gobyerno sa banwa sang La Castellana sa probinsya sang Negros Occidental sa mga dalan nga apektado sa pag-ilig sang lahar nagikan sa Mt. Kanlaon.
Sa pagpakig-angut sang Bombo Radyo sa Bombo Radyo Bacolod, ginpahayag sini nga kadungan sang pagbubo sang mabaskog nga ulan kahapon sa ila lugar amu man ang pag-ilig sang lahar sa dalan nagikan sa Mt. Kanlaon kung sa diin nangin mabudlay sa mga residente.
Partikular nga tuman naapektuhan amu ang Barangay Cabacungan, kag Masulog kung sa diin mas ginpakamaayo na lamang sang mga residente nga magpabilin sa evacuation center kag magsunod sa mga advisory nagikan sa gobyerno.
Mahibaluan nga tuman ka dakmol sang lahar kag abo ang nag-ilig sa lugar kung sa diin gilayon nga nagpalapta sang mga emergency response team ang gobyerno agud magbulig sa mga apektado nga pumuluyo.
Samtang, padayon naman nga nagapanawagan ang mga LGUs sang bulig para sa pumuluyo para sa pang-adlaw-adlaw nga kinahanglanon partikular na ang pagkaon kag tubig.
Matandaan nga sadtong Lunes sang gab-i naglupok ang Mt. Kanlaon kung sa diin naghatag ini sang kagugmat sa mga residente sa amu nga probinsya.
