Hugot nga ginapatuman ang close monitoring sang local government unit sang Sigma, Capiz agud malikawan ang African Swine Fever.
Sa interview sang Bombo Radyo kay Sigma, Capiz Mayor Dante Rizal A. Eslabon , iya ginpahayag nga sa subong yara sa Pink Zone ang nasambit nga nga nagakahulugan nga wala sang na-monitor nga affected nga baboy.
Suno kay Eslabon, daku nga bulig ang monitoring sa banwa paagi sang inspection sa swine racers, talipapa, merkado kag mga slaughter houses.
Pahayag pa niya, nagpagwa ini sang memorandum sa 21 ka mga barangay agud insigida nga mag-report kun may yara sang ginasuspetsahan nga kaso sang ASF.
Dugang pa sang natungdan, para masigurado nga wala sang ASF ang karne sang baboy dapat may yara ini sang mapakita nga sertipikasyon sang Business Permits and Licensing Office ukon BPLO kag Municipal Agriculture Office nga nagapamatuod nga ang karne sang baboy naghalin sa slaughter house.
