ROXAS CITY- Nag-umpisa na sang Sabado, Nobyembre 15, ang closed fishing season sa Visayan Sea nga magalawig tubtob Pebrero 15, 2026.
Sa interview sang Bombo Radyo kay Remia A. Aparri, Regional Director sang DA-BFAR 6, iya ginpahayag nga katuyuan sang programa nga proteheran ang mga isda kag ang kalalawran pamaagi sang tatlo ka bulan nga untat sa pagpangisda.
Suno kay Aparri, ipatuman ang closed season sa mga lugar nga ginakabig nga “most affected areas,” kalakip ang baybayon sang Iloilo, Capiz, Negros Occidental, kag Masbate. Ang mga isda nga ginadumilian nga kwaon sa amo na panahon amo ang Gumaa, Sardinas, Tabagak, Bulaw, kag Alumaan.
Apisar may 535 species sang isda sa Visayan Sea, tatlo lamang ang hugot nga ginadumilian sa sulod sang closed fishing season.
Para sa mga magalapas sa ginapatuman nga polisiya, may yara sang nagkalain-lain nga penalidad:
- Municipal fishing: ₱20,000 kag tatlo ka pilo sang bili sang nakuha nga isda
- Small-scale fishing: lima ka pilo ukon ₱100,000
- Medium-scale fishing: lima ka pilo ukon ₱300,000
- Commercial fishing: lima ka pilo ukon ₱500,000 kag posible nga mapreso sang anom (6) ka bulan kalakip ang pagkumpiska sang mga fishing gear.
Ginpalab-ot man sang BFAR nga mahimo magsaka ang presyo sang isda kag iban pa nga produkto bangud sa law of supply and demand, apang ginsigurado nga ang pagpatuman sang closed fisihing season ang para sa kaayuhan sang tanan kag para sa food security sang pungsod.
Pahayag niya, ang closed fishing season ang indi lamang para sa subong nga pagproteher sa mga isda, kundi pati na man sa masunod nga henerasyon.
Dugang pa sang natungdan, kun indi ini maproteksyonan subong, wala na sang may mabilin para sa masunod rason nga nagapanawagan ang BFAR sa tanan nga manugpangisda nga magbuligay sa pagpatuman sang closed fishing season agud mapabilin ang kabuhi sang Visayan Sea.
Interviewed by Bombo Francis Biñas
