Nangin magarbo ang ginhiwat nga closing ceremony sang 2024 Paris Olympics.
Isa-isa nga nagparada ang mga atleta sang nagkalain-lain nga mga pungsod sa Staed de France kun sa diin dala sang mga ini ang ila mga medalya.
Nag-perform sa nasambit nga stadium ang mga local nga artist kag singer sang France kaangay nalang sang indie rock band nga Phoenix kag si Allan Roche nga nagtukar sang piano.
Isa sa mga ginkalangkagan nga ginbantayan sang tumalan-aw amo ang pagsaylo sang Olympic flag sa Los Angeles nga amo ang masunod nga host sang Olympics 2028.
Magluwas sa pagpasa ni Paris Mayor Anne Hidalgo sang Olympic Flag kay Los Angeles Mayor Karen Bass kag ini ang gindala niya kay US gymnast Simone Biles samtang nagatindog sa atubang si International Olympic Committee president Thomas Bach.
Pagkatapos sini, ginpatukar ang national anthem sang US nga ginkanta ni Filipino-American singer H.E.R. kun sa diin ginkalangkagan sang mga tumalan-aw ang pagguwa sang Hollywood actor nga si Tom Cruise nga bitbit ang hayahay sang Olympics antes naglumpat sa babaw sang Stadium.
Ginpabugal naman ni Paris Olympic organizing committee head Tony Estanguet nga ang Olympics sa ila nga pungsod ang may pinakamadamo nga audience size, attendance kag decibel levels.
Dugang pa sini nga ang nasambit nga Olympics sa Paris ang nakarekord man sang madamo nga mga marriage proposals sang mga magkahagugma nga tumalan-aw.
Kadungan man sang programa sa Paris, nangin star-studded ang pag-perform sa Venice Beach sa Los Angeles kun sa diin ginpangunahan sang banda nga Red Hot Chili Peppers, Billie Eilish, Dr. Dre kag Snoop Dogg.
Sa nasambit nga Olympics sa USA, ini na ang pang-apat nga beses matapos ang 40 ka tuig kun sa diin una sadtong 1980 sa New York, 1984 sa Los Angeles kag 1996 sa Atlanta, Georgia.
