Nakagwa na sa Pilipinas ang co-accused kag personal assistant ni Leyte Representative kag anay House Speaker Martin Romualdez sa P7.4-billion plunder case, sandig sa monitoring sang Bureau of Immigration (BI).
Ginpahayag sang BI nga si Joselyn Serenio nakabiyahe kag nakagwa sa pungsod antes pa gin-isyu ang hold departure order (HDO) batok sa iya kag sa iban pa nga respondents sa kaso.
Wala ginpahayag sang BI ang detalye parte sa iya pagbiyahe kag iban pa nga personal nga impormasyon ni Serenio bangud ginaprotektahan ini sang Data Privacy Act of 2012 kag iban pa nga mga layi.
Samtang, ginpahayag sang BI nga yara pa sa Pilipinas si Romualdez kag si Felicito Cristobal Guevarra, presidente sang Samchan Foreign Exchange Corporation.
Suno sa BI, padayon nila nga ipatuman sang istrikti ang HDO kag magahimo sang nagakaigo nga immigration measures santu sa ila mandato.
Sang damlat lang, nag-plead sang “not guilty” si Romualdez sa P7.4-billion plunder case nga ginpasaka batok sa iya kag tatlo pa ka respondents, nga may kaangtanan sa ginakwestyon nga flood control projects.
Gindala si Romualdez sa Quezon City Jail halin sa Philippine General Hospital sang Lunes sang gab-i matapos ginpahayag sang iya mga doktor nga estable na ang iya kondisyon kag mahimo na siya ma-discharge.
