Nadakpan sa Mabalacat City, Pampanga ang isa sa mga kaupod nga akusado nanday former presidential spokesperson Harry Roque kag Cassandra Ong sa kaso nga qualified trafficking in persons suno sa Criminal Investigation and Detection Group (CIDG).
Ginpahayag sang CIDG nga sadtong Mayo 22, sa ginpatigayon nga entrapment operation naaresto ang akusado nga si “Marlon” sa Barangay Tabun.
Si Marlon ang operations officer sang isa ka security agency nga aktibo sadtong nagakatabo ang qualified trafficking in persons sa Lucky South 99 Outsourcing Inc., isa ka Philippine offshore gaming operator (POGO) nga makit-an sa Porac.
Suno sa CIDG, may isa pa nga warrant of arrest batuk kay Marlon para sa 10 counts sang qualified trafficking in persons nga gin-isyu sang Regional Trial Court Branch 118 sa Angeles City, Pampanga sa diin wala sang ginrekomendar nga piyansa para sa iya nga kaso.
Sanday Roque kag iban pa ang may mga warrant of arrest angut sa kaso nga qualified trafficking in persons nga may kaangtanan sa mga iligal nga aktibidad sa POGO hub nga Lucky South 99.
Ang mga warrant gin-isyu sang Regional Trial Court Branch 118 sa Angeles City, Pampanga.
Hugot naman nga ginpanginwala ni Roque ang mga alegasyon kag ginsiling nga wala siya nangin legal counsel sang anuman nga iligal nga POGO, kag wala man siya nangin abogado sang Lucky South 99.
Dugang pa sini, gin-updan niya lamang sadto si Ong sa isa ka meeting bangud sa iya pagpati nga biktima ini sang estafa.
Sa karon, ang anay presidential spokesperson ang nagahinyo sang asylum sa Netherlands.
