Magasulod na subong nga adlaw sa audit phase ang impeachment trial batuk kay Vice President Sara Duterte, kasunod sang pagpresentar sang nagligad nga semana sang mga testigo nga nagkumpirma sang pagpaguwa kag pag-withdraw sang P612.5 million nga confidential funds gikan sa Office of the Vice President (OVP) kag Department of Education (DepEd).
Suno kay House panel kag Tingog Party-list Rep. Jude Acidre, maga-atubang sa Senate Impeachment Court ang mga testigo gikan sa Commission on Audit (COA) agud ipaathag ang pag-audit sang confidential funds kag pagsunod sa liquidation regulations.
Ginalauman man nga una nga magatestigo si anay COA State Auditor Roderick Wamil kag Supervising Auditor Celine May Del Campo, kag pagasundan ni Marivic Pareja, Director sang House Legislative Information Resources Management Department.
Madumduman nga nagtestigo sang nagligad nga semana ang duha ka anay opisyal sang Land Bank, kon sa diin ginbuyagyag ni Camposano nga ang kwarta nga gin-withdraw ni anay Special Disbursing Officer Edward Fajarda ang ginkuha paagi sa back room ukon fire exit sang bangko.
