Ginpasalig ni Gilas Pilipinas head coach Tim Cone nga tun-an sang maid-id ang kabug-usan nga performance sang national team kasunod sang kompleto sini nga elimination sa FIBA Asia Cup 2025.
Sa pag-recap, nagdominar ang Team Australia sa quarterfinals match batuk sa Gilas Pilipinas, 84-60 – ang rason kon ngaa lubos nga nadula ang Team Philippines sa nasambit nga paindis-indis.
Suno kay Cone, apisar temprano pa, pat-ud nga i-review sang team ang tanan nga videos kag overall performance sang team, agud magamit sa masunod nga hampang sang national team.
Luyag mahibaluan sang beterano nga coach ang mayor nga rason sang temprano nga pagka-usmod sang Gilas samtang nagaatubang sa Team Australia, bisan pa nga nakapakita ini sang clutch performances sa nagligad nga mga hampang sa eliminasyon.
Sa pihak nga bahin, nagapati si Cone nga indi na kinahanglan nga islan ang mga katapo sang national team.
Ginsiling sini nga wala sang may matabo kun ilisan lang ang mga humalampang nga wala ginatun-an kun paano mapasanyog ang performance sang pungsod.
Samtang, liwat nga atubangon sang Gilas ang Australia kag New Zealand sa Group A sang World Cup Qualifiers sa ulihi nga bahin sang sini nga tuig.
