ROXAS CITY – Nagpositibo na sa red tide ang meat samples nagikan sa coastal waters ukon kalalawran nga sakop sang President Roxas kag Sapian Bay sa bahin sang banwa sang Sapian kag Ivisan, Capiz.
Samtang nagapabilin nga positibo ang mga panginhason subong man ang kalalawran sa syudad sang Roxas, banwa sang Panay, kag Pilar.
Ini ang ba-se sa ginpaguwa nga shellfish bulletin no.19 sang Beaureu of Fisheries and Aquatic Resources (BFAR) central office nga nahamtang sa Quezon City, subong nga adlaw, Oktubre 5.
Maluwas sa mga nasambit nga kabanwahanan sa Capiz, nagpositibo man sa red tide ang Dauis kag Tagbiliran City sa Bohol, Matarinao Bay sa Eastern Samar, kag Dumaquillas Bay sa Zamboanga del Sur.
Sa pihak sini, bangud sa indi filter feeders ang isda, pasayan, pusit kag alimango mahimo sa gihapon ini kaunon apang limpyuhan lang sang maayo.
Liwat man nga ginpaalinton sang BFAR nga indi gid danay magkaon, magbaligya, magharvest kag magtransport sang panginhason samtang nagapabilin pa ang nasambit nga organismo nga nagadala sang red tide.
