Target sang Department of Agriculture (DA) nga pasanyugon kag pataason ang produksiyon sang coffee farms sa pungsod sang duha ka metriko tonelada kada ektarya agud makadungan ini sa pag-arangkada sang Vietnam sa amu nga industriya sa 2025.
Ini ang ginbuyagyag ni Agriculture Secretary Francisco P. Tiu Laurel Jr. sa iya nga pagbisita sa Northern Mindanao Agricultural Crops and Livestock Research Complex, nga gin-host sang Nestlé Philippines’ Bukidnon Integrated Coffee Center, sa Malaybalay, Bukidnon sang damlag lang.
Kadungan sini ang panawagan niya sa pribado nga sektor nga mangin kabulig sang gobyerno kag mga kooperatiba sang mga mangunguma para mas mangin mabakod kag mangin sustainable ang industriya sang kape sa Bukidnon, Mindanao ilabi na sa ginapangatubang subong sang pungsod nga pagpanghangkat tuga sang climate change.
Ginhatagan sang pagtamod sa iya nga mensahe ang pagganyat nga magpasakop sa kolaborasyon sa tunga sang mga mangunguma, Nestlé, German Federal Ministry, local government agricultural offices, DA High-Value Crops Development Program, kag sang iban nga ahensiya sa Mindanao Coffee Robusta Project sang DA nga nagresulta sa pagdoble sang coffee communities sa Bukidnon kag Sultan Kudarat nga sa karon naglab-ot na sa 3,000 ka komunidad. Suno diri, ang inisyatiba ang nagpabaskog sang produksiyon sang kape kag kita sang mga farmers.
Kadungan sini, ginpahayag niya nga target sang nasambit nga coffee project nga mapataas ang coffee farms yield sang tubtob 2 MT kada ektarya agud makasabay ang Pilipinas sa tuig 2025 sa Vietnam nga isa sa nagapanguna sa produksiyon sang kape sa rehiyon.
Samtang, ginsiling ni Tiu Laurel ang pagpanagtag sang P6.5 milyon nga bulig, kalakip na ang mga abono kag pondo, sa iya nga pagbisita para sa pagtukod sang coffee centers sa 16 nga grupo sang mga mangunguma nga nagpasakop sa nasambit nga event sa Mindanao Coffee Robusta Project.
Nagpasalamat man ini sa mga coffee farmer sa ila nga kapag-on kag sa “the real but unsung heroes” sa Philippine coffee industry, gani nagpromisa ini nga padayon nga suportahan ang mga ini sang gobyerno.
Suno sa Philippine Coffee Board, ginabanta nga naglab-ot sa 30,000 metriko tonelada ang produksyon sang green coffee beans sadtong 2023 nga medyo mas mataas sa 29,957 MT nga produksiyon sadtong 2022.
