ROXAS CITY – Ginkadismaya ni Punong Barangay Ferdinand Valles sang Barangay Lonoy sining siyudad ang alegar pagmulay sa ila ni Capiz Police Provincial Office Provincial Director Police Colonel Julio Gustilo, Jr., samtang nagapatigayon sila sang border checkpoint sa dulunan sang Roxas City kag banwa sang Ivisan kaina sang hapon.
Sa interview sang Bombo Radyo, ginpahayag ni Valles nga ginhambalan sila ni Gustilo nga wala sang mga pulos rasun nga ginpakamaayo na lamang nila nga i-pull out ang mga barangay tanod nga nagabulig sa mga kapulisan sa pagpatuman sang checkpoint sa lugar.
Nag-ugat suno diri ang pagpangakig ni Gustilo sang wala nila insigida ginpalusot sa checkpoint ang salakyan nga nagakarga sang mga saging naggikan sa banwa sang Dumalag.
Suno kay Valles, wala sila sang katuyuan nga balabagan ang salakyan apang wala sang may mapakita nga health declaration ang driver rasun nga wala nila ini ginpalusot insigida.
Ginpanugyanan nila ang driver nga kun mahimo, magpangita na lamang ini sang iban nga salakyan halin sa siyudad nga magasugat sa ila kag magkarga sang ila karga nga mga saging.
Apang nakibot sila sang mag-abot si Gustilo kag nagbuhi na sang mga malaw-ay nga tinaga batuk sa ila.
Nagalain ang buot ni Valles sa ginhimo ni Gustilo bangud suno sa iya, nagahimo lamang sila sang ila obligasyon sa checkpoint apang gin-akigan pa sila sang opisyal sa atubang sang madamo nga tawo nga naghatag sa ila sang dako nga kahuy-anan.
Ginpanindugan ni Valles nga ang ila ginhimo ang nakasandig man sa direktiba ni Mayor Ronnie Dadivas nga hugton ang mga border security sang siyudad bilang panaming batuk sa coronavirus disease 2019 (COVID-19)
