Nagapanawagan ang isa ka college student sa gobyerno nga panumdumon sang maayo ang pag-ban sang Facebook kag gaming applications bilang pamaagi agud masolusyonan ang school violence kag sala nga impormasyon.
Matandaan nga ginpahayag sang Palasyo nga bukas sila sa ginaduso sang Cybercrime Investigation and Coordinating Center nga i-ban ang facebook kag gaming apps.
Sa interview sang Bombo Radyo sa isa ka college student, iya ginpahayag nga indi bastante ang pag-ban sang facebook kag gaming apps sa pagsolbar sang problema.
Suno sa iya, indi mayor nga kabangdanan sang school violence ang social media kag may yara sang iban nga factors nga mahimo makaapekto sa behavior sang estudyante kaangay sang family environment kag mental health problems.
Panugyan sang natungdan sa gobyerno, pabaskugon ang peer support kag guidance counseling sa eskwelahan agud mabuligan ang mga estudyante nga makaatubang sang ila personal kag emotional problems.
Dugang pa niya, sa baylo nga i-ban ang Facebook, dapat nga tudloan ang mga estudyante kun paano i-check kag i-verify kun matuod ang mga impormasyon nga ila mabasahan.
