ROXAS CITY – Patay ang isa ka college student matapos nga ma-aksidente sa ginamaniho sini nga motorsiklo, takna alas 7:50 kagab-i sa National Highway sang Barangay Agkilo, Panitan capiz.
Ginkilala ang driver sang motorsiklo kay Jerico Angelo Fegarido kag residente sang Barangay Concencia sa amu nga banwa, samtang ang driver naman sang 10-wheeler truck amu si Herminio Mendoza Jr., 43-anyos kag residente sang Barangay Mianay, Sigma, Capiz.
Sandig sa nakuha nga impormasyon nagikan sa Panitan Municipal Police Station, nga samtang ginasubay ni Fegarido ang dalan padulong kun tani sa banwa sang Panitan sakay ang motorsiklo sini nga Suzuki nagaduag itom, sang ini ang aksidente nga nagbunggo sa 10-wheeler truck nga ginamaneho paatras ni Mendoza agud nga magparking.
Mahibaluan nga madasig ang pagpadalagan ni Fegarido rason nga wala ini gilayon nakapreno kag deritso nga bumunggo.
Bangud sini, nag-angkon sang patal nga pilas sa magkatuhay nga parte sang lawas si Fegarido kag gilayon nga ginpadangat sa Bailan District Hospital para sa nagakaigo nga pagbulong, apang, nadulaan man ini sang kabuhi samtang ginabulong.
Sa karun yara na sa kustodiya sang Panitan MPS ang motorsiklo para sa nagakaigo nga disposisyon.
