Naghatag sang pahanumdom si President Roxas Mayor Receliste Escolin nga indi na pagpasugtan nga magpadayon sa pagbiyahe ang mga colorum nga tricycle ukon mga wala sang balido nga prangkisa sa banwa.
Sa interview sang Bombo Radyo kay Escolin, iya ginpahayag nga magahiwat sila sang pagsinapol agud maestoryahan ang mga pamaagi kag tikang nga ipatuman sa pagdumili sa operasyon sang mga wala sang nagakaigo nga permiso.
Pahayag pa niya, kapin 200 ka mga tricycle ang may legal nga prangkisa sa banwa, apang mas madamo pa ang mga wala sang prangkisa nga nagapadayon sa pagbiyahe.
Dugang pa sini, indi na niya pagpasugtan nga magpadayon ang amo nga sitwasyon kag ginpaandaman ang mga operator nga pagadakpon ang ila mga tricycle kon maglapas sa patakaran.
Nahibaluan nga ginhatagan na sang bastante nga tion ang mga operator agud magkuha ukon mag-renew sang ila prangkisa, apang may pila gihapon nga wala nagtuman sa nasambit nga kinahanglanon.
