Ginpahunong sang Land Transportation Office Region VI (LTO-6) ang isa ka pribado nga van nga nagadala sang mga turista halin Antique pakadto sa Iloilo City kag duha ka wing van nga gin-hire sa pagdala sang mga parcels bangud nagabiyahe nga wala sang balido nga prangkisa ukon permiso sa operasyon.
Natabo ini samtang ginpabaskog sang LTO-6 ang inspeksyon sa mga terminal kag random nga pag-usisa sa mga salakyan sa higad sang dalan antes ang pagdamo sang mga nagabiyahe para sa Undas, paagi sa kampanya nga “Oplan Biyaheng Ayos: Undas 2026.”
Sa nasambit nga operasyon, naka-inspection na ang LTO-6 sang kapin sa 2,500 ka public utility vehicle sa bug-os nga Western Visayas. Halin sang pagsugod sang operasyon sang Oktubre 23, nagpagwa na ang mga enforcer sang kapin sa 60 ka Temporary Operator’s Permit bangud sa nagkalain-lain nga paglapas.
Tatlo ka colorum nga salakyan ang na-impound, samtang ang duha ka wing van ginpaidalom sa technical impoundment.
Nagapabilin sa mataas nga lebel sang kahandaan ang mga enforcer, deputized personnel kag support staff sa mga importante nga terminal kag sentro sang transportasyon, samtang nagatapos subong, Oktubre 27, ang una nga hugna sang operasyon.
Suno sa LTO-6, ang pribado nga van nasapwan sang mga personnel sang Regional Law Enforcement Section, nga ginapangunahan ni Chief Jetster T. Mandadero, sa Mohon Terminal sa Arevalo, Iloilo City, sang Oktubre 25.
Ang van nagadala sang mga turista kabaylo sang bayad bisan wala sang kinahanglanon nga permiso para sa amu nga klase sang serbisyo.
Sa separado nga operasyon, ginpahunong naman sang mga personnel sang LTO Passi City District Office, sa pagpanguna sang Acting Chief nga si Relin Reyes, ang duha ka wing van nga gin-hire sa pagdala sang mga parcels nga wala sang balido nga Provisional Authority ukon Certificate of Public Convenience (CPC).
Ginkumpirmar sang Land Transportation Franchising and Regulatory Board (LTFRB) nga gin-dismiss ang mga aplication para sa bag-o nga CPC sang duha ka salakyan kag ginakanselar ang ila provisional authority.
Ginkumpiskar man sang mga enforcer ang mga plaka sang mga van kag ginmarkahan ang ila mga rekord bangud sa ginapahayag nga colorum nga operasyon.
Indi lamang sa mga terminal nagafocus ang kampanya, kundi nagapatigayon man ang mga enforcement team sang inspeksyon kag pagmonitor sa pagsunod sang mga driver sa mga nagapanguna nga ruta sang pagbiyahe.
Sumugod Enero sini nga tuig, kapin sa 200 ka colorum nga salakyan ang nadakpan sang LTO-6 sa bug-os nga Western Visayas. Lakip diri ang mga motorsiklo, traysikol, taxi, sedan, van kag multipurpose vehicle.
Padayon nga ginapanawagan ni LTO-6 Regional Director Atty. Gaudioso P. Geduspan II ang mga operator nga magkuha anay sang nagakaigo nga prangkisa ukon permiso sa operasyon halin sa LTFRB antes magbaton sang mga pasahero nga nagabayad.
Ginpahanumdom niya nga ang wala sang otorisasyon nga serbisyo nagabutang sa peligro sa mga pasahero kag nagahatag sang indi patas nga kompetisyon sa mga lehitimo nga operator nga nagasunod sa mga kinahanglanon.
Ang magalapas mahimo mag-atubang sang multa, pagkumpiska ukon pag-impound sang salakyan, kag iban pa nga silot sa idalom sang Joint Administrative Order No. 2014-01.
Sa idalom sang Public Service Act kag Executive Order No. 202, ang mga serbisyo sa transportasyon sang pasahero nga sakop sang hurisdiksyon sang LTFRB kinahanglan may balido nga Certificate of Public Convenience ukon iban nga nagakaigo nga permiso sa operasyon.
Ginadumilian man sang Section 7 sang Republic Act No. 4136 ang paggamit sang mga salakyan nga rehistrado para sa pribado nga paggamit sa pagdala sang mga pasahero kapalit sang bayad.
Samtang, ang LTFRB Memorandum Circular No. 2024-038, nga nag-epekto sang Oktubre 10, 2024, nagkuha sang nauna nga mga exception para sa pila ka ginapaarkila nga pribado nga salakyan kag rent-a-car service.
Ginamanduan sini ang mga ahensya nga nagapatuman sang kasuguan nga dakpon ang mga pribado nga salakyan nga ginagamit bilang public utility vehicle nga wala sang kinahanglanon nga otorisasyon.
Ang una nga hugna sang Oplan Biyaheng Ayos: Undas 2026, nga ginpatuman halin Oktubre 23 tubtob 27, nagapokus sa mga nagaguwa nga biyahe paagi sa inspeksyon sa mga terminal kag pagmonitor sa mga nagapanguna nga ruta.
Sumugod buwas, Oktubre 28, tubtob Nobyembre 4, magafocus naman ang ikaduha nga hugna sa pagdumala sang trapiko sa tion sang Undas kag sa pagpauli sang mga biyahero.
Bantayan sang mga enforcement team sang LTO-6 ang mga nagapanguna nga dalan kag ruta pakadto sa mga sementeryo kag memorial park samtang nagadamo ang salakyan kag mga tawo nga nagalakat.
Ginapahanumdom man sang mga otoridad ang tanan nga motorista nga magsunod sa pagsul-ob sang seat belt, kaluwasan sang mga kabataan nga pasahero, nagakaigo nga paghalong sa paggamit sang motorsiklo, kag paglikaw sa pag drive samtang nadisturbo ukon nadulaan sang focus.
Padayon ang pagpabaskog sang LTO-6 sa pagpatuman sang mga regulasyon sa transportasyon agud masiguro ang mas luwas, organisado kag masaligan nga pagbiyahe sang publiko sa tion sang Undas 2026.
