ROXAS CITY – Wala pa nakapatigayon sang opisyal nga imbestigasyon ang Committee on Health sa Sangguniang Panlalawigan angut sa kontrobersiya nga gindalahigan sang Roxas Memorial Provincial Hospital (RMPH) sa diin may apat ka mga pasyente sa Intensive Care Unit (ICU) nga napatay sa sulod lamang sang isa ka adlaw sang nagligad nga bulan sang Disyembre.
Ginpahayag ni Board Member Steve Contreras nga bukas ang iya komite nga pangunahan ang imbestigasyon sa nasambit nga isyu agud ila matul-id ang matood nga natabo.
Apang indi pa nila matalakay ang isyu bangud napagkit sa laye nga indi sila maka-tratar sang iban nga subject matter tobtob indi maaprubahan ang Annual Investment Plan (AIP) 2020 kag Annual Budget sang probinsiya
Ginpasiguro ni Contreras nga matapos maaprubahan ang AIP kag pondo sang probinsiya sini nga 2020, pagasuguran na sini ang imbestigasyon sa RMPH controversy.
