Gin-athag sang Commission on Elections (Comelec) nga wala sang pagbag-o sa Nobyembre 2, 2026 nga schedule sang Barangay and Sangguniang Kabataan Elections (BSKE).
Sa interview sang Bombo Radyo kay Atty. Wil Arceño, Provincial Election Supervisor sa Capiz, iya ginpahayag nga nagapreparar sa gihapon ang Comelec para sa palaabuton nga eleksyon.
Suno kay Arceño, yara pa lang sa committee level ukon sa Senate local government committee ang pagpasar sang hagna nga nagahingyo nga ipaiway ang BSKE nga natalana sa Nobyembre 2 kag ang pag-set sang fixed nga five-year term para sa barangay kag SK officials.
Pahayag niya, indi pa ini buot silingon nga na-postpone na ang Barangay and SK elections.
Sa pagkamatuod dugang niya, mahimo na makakuha sang Certificate of Candidacy (COC) form ang sin-o man nga luyag magpapili sa eleksyon.
