ROXAS CITY – Ginarespeto sang Commission on Elections (Comelec)-Capiz ang ginpananaug nga Temporary Restraining Order (TRO) sang Korte Suprema, angut sa Operation Baklas sang ahensya.
Suno kay Atty. Salud Milagros Vilanueva, election supervisor sang Comelec-Capiz, nga wala sang problema ang amu nga TRO, kag pagasundon ang mandu sang pinakamataas nga Korte sa pungsod.
Apang, ginpanindugan sang Comelec, nga magapangkakas sila sa gihapon sang mga oversized nga campaign materials nga nahamtang sa pampubliko nga lugar.
Samtang, nagapanawagan ang ahensya sa mga lokal nga kandidato nga mag-amat-amat na sa pagpangkakas sang ila mga oversized tarpaulins bangud sa palaabuton nga Marso 25, sa pagsugod sang opisyal nga campaign period sa bahin sang local candidates, indi magduha-duha ang Comelec nga kakason ang magalapas sa ila pagsulondan.
Sa pihak nga bahin, masaku sa karon ang ahensya sa paghanas sang 1,812 electoral board members, kun sa diin, igapaidalom pa ang mga ini sa eksaminasyon sang DOST nga kinahanglan nila pagapasaron.
