Nagapadayon ang preparasyon sang Commission on Elections (Comelec)-Capiz para sa Barangay kag Sangguniang Kabataan Elections (BSKE) 2026 samtang wala pa sang opisyal nga mandato ukon layi nga nagapahanugot sa pag-postpone sang eleksyon.
Sa interview sang Bombo Radyo kay Atty. Wil Arceño, Assistant Regional Director sang Comelec Region VI kag Concurrent Provincial Election Supervisor sang Capiz, iya ginpahayag nga padayon ang tanan nga pagpanghanda sang komisyon bangud ang BSKE ang nagapabilin nga natalana sa Nobyembre 2, 2026, suno sa nagapadayon nga election calendar sang Comelec.
Suno kay Arceño, tubtob wala pa sang opisyal nga direktiba halin sa Comelec ukon wala pa sang ginapasar nga layi nga nagapostpone sang eleksyon, obligasyon sang komisyon nga ipadayon ang tanan nga preparasyon agud mangin handa sa natalana nga adlaw sang piniliay.
Ginpahayag man sini nga ang mga preparasyon nagalakip sang pagpatuman sang election calendar, pag-update sang listahan sang mga botante, kag iban pa nga administratibo nga tikang nga kinahanglan antes ang eleksyon.
Samtang nagapadayon ang preparasyon, padayon man ang diskusyon sa nasyonal nga lebel matapos may pila ka mga kongresista kag senador nga nagsuporta sa panawagan nga ipaiway anay ang BSKE 2026.
Kabahin sa mga ginahatag nga rason amo ang nagapadayon nga krisis sa pungsod, ang posible nga makatipid ang gobyerno sang bilyon-bilyon nga pondo, kag ang pagtupa sang iskedyul sang eleksyon sa panahon sang Pista Minatay.
Sa pihak sini, ginpahanumdom sang Comelec nga indi ini mahimo nga magpundo sang preparasyon bangud lamang sa mga panawagan ukon espekulasyon.
