ROXAS CITY – Naglab-ot sa kapin 45,000 ang mga madinalag-on nga nakaparehistro sa Commission on Elections (Comelec) sa probinsya sang Capiz sumugod sang Hulyo 4 tubtob Hulyo 24, 2022 para sa palaabuton nga Barangay kag SK Elections.
Ini ang ginkumpirmar ni Atty. Wil Arceño, Provincial Election Supervisor sang Comelec-Capiz sang mainterview sang Bombo Radyo.
Ba-se sa datos sang Comelec, 27,000 ang mga nakaparehistro nagaedad 15-17, kapin 18,000 naman ang mga regular nga mga botante samtang wala naman nalakip ang mga nagbalhin ukon nagtransfer sa iba nga mga kabarangayan kag kabanwahanan.
Suno kay Arceño, nagdamo ang mga luyag magparehistro subong nga eleksyon kumparar sa nakaligad nga tuig ilabi na sa SK bangud isa sa mga factors nga gintan-aw sa pagdamo sini amu ang makuha nga mga benepisyo kun ikaw ang magdaug sa eleksyon.
Mahibaluan nga gin-aprubahan ni Former President Duterte ang gin-amyendahan nga layi nga Sangguniang Kabataan Reform Act of 2015, kun sa diin mahimo na nga makabaton sang monthly honorarium ang mga SK Kagawad kag entitled na para sa civil service eligibility.
Posible suno diri nga pila sa mga nagparehistro ang may tinutuyo nga magpadalagan sa palaabuton nga eleksyon.
Samtang, ginklaro naman ni Arceño nga wala na sang ekstensyon para sa pagparehistro bangud nakasaad sa layi sang talapatan nga wala na sang magparehistro 120 diyas antes ang eleksyon agud indi magguba ang timeline schedule sang comelec.
Mahimo lamang nga ma-extend ang pagparehistro kun iga-postponed ang Barangay kag SK Elections.
Sa karon, ginahulat-hulat pa ang mangin desisyon ni President Ferdinand Marcos Jr., kun madayon ang eleksyon sa Disyembre 5.
