ROXAS CITY – Ginpahayag sang Provincial Election Supervisor sa Capiz nga madamo sang nagaparehistro kada adlaw sa mga talatapan sang Comission on Elections sa mga kabanwahan kag diri sa syudad.
Sa interview sang Bombo Radyo kay Atty. Wil Arceño, ginkumpirmar sini nga 26,492 ang bag-o nga mga rehistrado nga botante ang nadugang sa probinsya sa sulod sang kapin duha ka semana, sumugod sang nagbukas ang Comelec sang registration sang Hulyo 4.
Mataas ini nga numero suno diri, kag ginalauman nga madugangan pa ini tubtob sa katapusan nga adlaw sa pagparehistro, sa Hulyo 23.
Sa nasambit nga numero, kapin 10,000 diri ang mga regular voters ukon naga-edad 18-anyos pataas, kag ang nabilin sa masobra 26K nga newly registered voters ang mga pamatan-on naga-edad 15 tubtob 17 anyos.
Talalupangdon man suno kay Arceño ang mga Barangay officials nga may bitbit nga mga pamatan-on agud iparehitsro, apang suno diri, indi man ini bawal sa ila ahensya.
Pangabay lang sang election supervisor nga likawan ang pagsal-ot sa pila kag indi magpa-awat-awat sa pagparehistro bangud sa karon, wala sang extension sa registration.
Magluwas sa Comelec offices sa mga munisipyo kag city hall, may satellite offices man ang ahensya sa dako nga mall sa Brgy. Lawaan, sini nga syudad alas-8 sa aga tubtob alas-5 sa hapon, Lunes tubtob Sabado.
Wala paman suno diri sang mandu kun ipaiway ang SK kag Barangay Elections, nga gintalana sang Comelec sa Disyembre 5, 2022.
