Ginpahayag ni COMELEC Chairman George Erwin Garcia nga bukas siya sa pag-automate sang November 2026 Barangay and Sangguniang Kabataan Elections (BSKE) bangud sang benepisyo sini sa eleksyon.
Sa exclusive interview sang Bombo Radyo Philippines kay Garcia, iya ginpahayag nga sa tion nga ma-automate na ang isa ka eleksyon, mas madasig nga mahibaluan ang resulta sang pagboto. Gindugang sini nga malikawan man ang kalakasan kun ini ang automated bangud gilayon nga ginabaton sang mga napierde ang resulta indi kaangay kon manual ang pag-isip nga nagapabaskog man sang init sang away sa tunga sang tagsa ka kandidato.
Bisan pa, mangin isa pa ini ka preparasyon para sa poll body sa tion nga ma-automate ang BSKE, indi madula ang mga benepisyo sini sa pagpatigayon sang mas mahim-ong kag malinong nga eleksyon pareho sang nasaksihan man sang mga botante kag mga poll bodies sa nagligad nga Midterm Elections sang Mayo.
Samtang, ginpakigbahin man ni Garcia nga padayon ang pagdugang sang voter registration sang komisyon sa bug-os nga pungsod. Ginsiling sini nga halos 65% sang mga nagaparehistro ang first-time registrant.
Isa ini ka maayo nga indikasyon nga nagapakita sang interes sang mga Pilipino nga makaboto sa masunod nga mga eleksyon.
Magalawig tubtob Agosto 10 ang Voters Registration kag natalana nga magapadayon pagkatapos sang Bangsamoro Parliamentary Elections sa Oktubre sini nga tuig.
