Ginkansela sang COMELEC En Banc ang Certificate of Candidacy ni Efren Perez Aliperio pagka-Punong Barangay sang Barangay Lawaan, Dumarao, Capiz kag ginkakas ang pangalan sini sa opisyal nga listahan sang mga kandidato.
Sa interview sang Bombo Radyo kay Dumarao Capiz Mayor Mateo Hachuela, iya ginpahayag nga nagakabalaka ini sa sitwasyon ilabi na sa posible nga epekto sini sa nasambit nga Barangay.
Dugang pa ni Hachuela, nahibaluan na nila ini sang tinalikdan nga bulan apang wala niya ini ginsapak bangud ginpahayag sang COMELEC nga final and executory na ang desisyon kag yara sa komisyon ang jurisdiction sa pag-implementar sini.
Na-ugat ang desisyon sang COMELEC sa Petition to Deny Due Course to ukon Cancel Certificate of Candidacy nga ginpasaka sang residente nga si Arnold Sotillo Vicente batok kay Aliperio.
Suno sa legal nga dokumento, may yara sang final judgment batok kay Aliperio sa kaso nga Robbery in Band kag ini ang ginakalakipan sang perpetual special disqualification, buot silingon indi sa pwede magpadalagan sa pampubliko nga posisyon, apisar nga ginpahayag sini nga natapos na niya ang iya sentensya sang 2012.
Sa subong, ginahulat pa kun magapadayon bilang kapitan si Aliperio ukon boluntaryo nga maghalin sa pwesto, samtang ginpasalig naman ni Mayor Hachuela sa mga pumuluyo sang Barangay Lawaan nga magapadayon ang serbisyo sa barangay.
