Ginpahanumdom sang Commission on Elections (COMELEC) ang publiko nga maghanda sa liwat nga pagbukas sang voter registration sa Nobyembre 10, 2026, kag siguraduhon nga handa na ang mga kinahanglanon nga dokumento antes magpadulong sa mga registration sites.
Sa interview sang Bombo Radyo kay Atty. Will Arceño, Assistant Regional Director sang Comelec Region 6, iya ginpahayag nga ang mga luyag magparehistro ang dapat nga hibaluon anay ang mga kinahanglanon nga proseso kag ihanda ang ila mga dokumento agud malikawan ang kabudlayan sa pagparehistro.
Suno kay Arceño, indi na maghulat sang katapusan nga mga inadlaw antes magpadulong sa mga talatapan sang Comelec, agud malikawan ang posible pagginutok sang mga registration centers.
Samtang, ginpahanumdom man sini ang mga senior citizens, persons with disabilities (PWDs), mga nagabusong kag iban pa nga sakop sang vulnerable sectors nga hatagan sang igtalupangod ang ila kaluwasan kag kasulhay samtang nagapatigayon sang registration ilabi na bangud sa epekto sang Super El Niño.
Ginapanugyanan man ang tanan nga mga aplikante nga magsunod sa pagsulundan sang registration personnel, mangin kalmado sa pila kag siguraduhon nga husto kag kumpleto ang mga impormasyon nga ginsulod sa ila aplikasyon agud malikawan ang problema sa ila voter records.
Samtang ginalauman nga magapadayon ang voter registration tubtob sa Hulyo 30, 2027, bilang preparasyon sa 2028 National kag Local Elections.
