Handa ang Commission on Elections ukon COMELEC sa bisan ano nga desisyon sang Supreme Court parte sa petition nga nagakwestyon sa postponement sang Barangay kag Sangguniang Kabataan Elections ukon BSKE.
Suno kay COMELEC Chairman George Garcia, preparado ang poll body sa aspeto sang budget kag operasyon, kun magpagwa sang ruling ang Supreme Court.
Apang ginpahayag niya nga indi na madayon ang BSKE sa original nga schedule nga Nobyembre 2, bangud nga una na nga ginpauntat sang COMELEC ang tanan nga election-related activities kasunod sang bag-o nga layi.
Samtang, naglab-ot na sa 8 billion pesos ang nagasto sang COMELEC para sa preparasyon sang 2026 BSKE, lakip na ang mga kagamitan, balota kag manpower.
Suno kay Garcia, mahimo pa magamit sa masunod nga mga eleksyon ang kalabanan sang mga kagamitan nga naprocure, basta husto ini nga matago.
Ang pondo nga indi magamit para sa BSKE mahimo man nga iga-alokar sa preparasyon para sa 2028 national elections.
Samtang, ginapaabot nga magalab-ot sa 29.5 bilyon pesos ang proposed 2027 budget sang COMELEC sa idalom sang National Expenditure Program.
Ini ang 46 percent nga mas mataas kun ikomparar sa nagligad nga allocation, bangud sa preparasyon para sa 2028 elections.
