ROXAS CITY – Igalunsyar na sang Commission on Elections (COMELEC) ang ‘Register Anywhere Program’ (RAP) drive nationwide kadungan sa pagsugod sang voters registration sa Pebrero 12, 2024.
Sa interview sang Bombo Radyo kay Atty. Wil Arceño, Provincial Election Supervisor sang COMELEC Capiz, suno diri tinutuyo sang nasambit nga programa nga hatagan sang kahigayunan ang mga empleyado kag estudyante nga yara sa malayo nga lugar nga makaparehistro kag makaboto para sa 2025 National and Local Elections.
Sa idalum sang RAP, pagatugutan sang COMELEC ang mga magaparehistro nga magpasa sang ila registration form sa tanan nga RAP sites bisan sa diin man sila naga-istar.
Ang COMELEC naman ang magapasa sang ila mga form kun sa diin nga lugar luyag nila magparehistro.
Kalakip sa serbisyo nga igatan-ay sang programa amu ang new registration, transfer of registration nagikan sa iban nga syudad/banwa/distrito, transfer of registration halin overseas sa lokal, change of status kag reactivation.
Suno kay Atty. Arceño, once a month lang ini pagahiwaton kag igapahamtang ini sa Roxas City.
Samtang, magasugod naman sa Pebrero 12 tubtob Setyembre 30, 2024 ang voters registration.
Pahanumdom ni Arceño nga ginabawalan sang COMELEC ang paggamit sang company ID kag government issued ID’s lamang ang ginabaton agud makaparehistro.
Pananglitan wala sang ID, kinahanglan ipresentar sang Barangay Certification nga may picture kag pirma ang magaparehistro.
Bukas naman ang tanan nga local offices sang COMELEC humalin 8:00 tubtob 5:00 sang hapon, Lunes tubtob Sabado.
