ROXAS CITY – Indi makapauntat sa Commission on Elections (COMELEC) ang pagpapasar sa ikatatlo kag katapusan nga pagbasa sang House Bill No. 4673 nga nagapostpone sa Barangay kag SK Elections sa December 2023, sa ila nga preparasyon para sa eleksyon.
Sa interview sang Bombo Radyo kay Atty. Wil Arceño, Capiz Provincial election officer, ginpahayag sini nga pagahulaton nila sa COMELEC ang pagpapasar bilang isa ka layi, sang nasambit nga hagna.
Bangud sini, magapadayon sila sa ila preparasyon, kaangay sa pag-imprinta sang balota, para sa Barangay kag SK Elections sa December 2022, santu sa ila calendar of events.
Panindugan sang COMELEC, nga kun iga-postpone ang BSK elections sa Disyembre 2023, maga-request ang ila ahensya sang kapin P5 bilyon nga dugang nga pondo, bangud indi bastante ang P8 bilyon sa masunod nga tuig para sa liwat nga pagbukas sang registration, training kag bayad sa mga manunudlo, election paraphernalia kag iban pa.
Ginpahayag man ni Arceño nga posible ang rason sa postponement sang Barangay kag SK Elections, bangud may nagalagaw nga istorya nagikan sa pila ka Kongresista, nga posible dulaon na ang Sangguniang Kabataan (SK) kag ginadihon nga ipahamtang sa iban nga organisasyon agud sa gihapon may representante ang mga Kabataan, apang indi na sang SK Federation.
Sa karon, pagasundon sang COMELEC ang pagpatigayon sang Election period sa Oktubre 6, 2022, apang sa bahin sang Kongreso, ginapahayag sang mga ini nga antes ang Oktubre 1, makapaguwa na sang desisyon ang gobyerno angut sa Barangay kag SK elections.
