Nagpaandam ang Commission on Elections (COMELEC) nga gilayon nila nga aksyonan ang sin-o man nga mapamatud-an nga nagkawat sang obra sang isa ka artist agud gamiton sa ila campaign jingle.
Suno kay Commission on Elections (COMELEC) Chairman George Erwin Garcia, ang kolaborasyon sang komisyon kag sang Intellectual Property Office of the Philippines (IPOPhil) amo ang magabantay sang intellectual rights sang mga artista sa sini nga kampanya.
Gindugang pa ni COMELEC Chairman Garcia nga dapat respetuhon ang mga artista nga Pilipino sa ila kaugalingon nga mga obra kag indi lamang pagkuhaon kag gamiton.
Gin-engganyo ni Garcia ang mga artista nga mag-file sang reklamo sa ila talatapan kon ma-eksperyensyahan ini kag gilayon ini nga imbestigaran sang komisyon kag magpasaka sang nagakaigo nga kaso batok sa kandidato.
Magluwas sa Intellectual Property Office of the Philippines (IPOPhil), ang mga kandidato nga nagagamit sang copyrighted songs nga wala sang pahanugot sang artist ang mahimo nga magapangatubang sang kaso sa idalum sang Republic Act No. 8293 ukon Intellectual Property Code of the Philippines.
Sang damlag lang, nagpasaka sang reklamo si Omar Harry Manzano ukon mas kilala sa ngalan nga ‘Omar Baliw’ batok sa isa ka kandidato sa pagka-senador nga gingamit ang iya kanta bilang campaign jingle nga wala sang pahanugot.
Subong man ang banda nga Lola Amour nag-anunsyo sa ila social media nga may mga tawo nga naggamit sang ila kanta nga wala sang pahanugot.
