Padayon sa gihapon ang preparasyon sang Commission on Elections (COMELEC) para sa Barangay kag Sangguniang Kabataan Elections kasunod sang pag-aproba sa third kag final reading sang Senado ang Senate Bill No. 2387 nga palawigon ang termino sang mga barangay kag SK officials.
Sa interview sang Bombo Radyo kay Atty. Wil Arceño, Assistant Regional Director sang COMELEC Region 6, iya ginpahayag nga ang amo nga hagna indi pa opisyal nga layi bangud kinahanglan pa nga mag-agi sa masunod nga proseso antes ipatuman.
Suno kay Arceño, padayon ang ila preparasyon para sa BSKE samtang ginahulat ang mangin pinal nga desisyon.
Nahibaluan nga sa ginapropose nga amendment, tinutuyo sini nga palawigon ang termino sang mga barangay kag SK officials sa lima ka tuig tubtob Nobyembre 30, 2028, antes ipatuman ang masunod nga eleksyon.
