Target sang Commission on Elections (COMELEC) nga ipatigayon ang special election sa Disyembre 19 para sa lone congressional district sang Batanes.
Ini ang resulta sang pagkapatay ni Batanes Representative Ciriaco Gato Jr. kahapon, Setyembre 21, bangud sa cardiac arrest.
Sa exclusive nga pagpakig-angut sang Bombo Radyo Philippine kay COMELEC Chairman George Erwin Garcia, siling niya nga ang amu nga petsa sulod sa timeline nga ginpatuman sang Konstitusyon.
Ginakalkula na sang poll body ang budget nga kinahanglan para sa amu nga piniliay.
Ginabulubanta nga may yara sang 30,000 ka rehistrado nga botante sa lone district sang Batanes.
Suno kay Garcia, mahimo nila magamit ang pila sa mga kagamitan nga kuntani gamiton sa Barangay kag Sangguniang Kabataan Elections ukon BSKE, madayon man ukon indi ang amu nga piniliay.
Katuyuan sini nga makapamenos sa magastos sang COMELEC para sa special election.
Kinahanglan nga ipatigayon ang special election indi mas temprano sa 60 ka adlaw kag indi malampuwasan ang 90 ka adlaw halin sang pagkabakante sang posisyon.
Nagpatawag na man si Garcia sang emergency meeting upod ang mga field officials sang COMELEC agud pagatalakayon ang mga preparasyon para sa election.
Bisan pa nga sunod-sunod ang mga election, special election kag plebisito nga ginpatigayon sini nga tuig, siling ni Garcia nga kinahanglan gihapon nila tumanon ang ila mandato.
Apang, kinahanglan nila sang bastante nga pondo kag tion agud makapreparar ang tanan nga kinahanglanon para sa special election.
Si Gato 66 anyos sang siya napatay. Nagserbe siya bilang representante sang Batanes halin 2019, kag liwat nga napili sang 2022 kag 2025.
