Untaton sang Commission on Elections ukon COMELEC ang tanan nga aktibidad nga yara sa calendar of activities para sa natalana kuntani nga Barangay kag Sangguniang Kabataan Elections ukon BSKE 2026.
Ini matapos pirmahan ni President Ferdinand Marcos Jr. ang Republic Act No. 12232 nga nagapalawig sang termino sang mga Barangay kag Sangguniang Kabataan officials halin sa tatlo ka tuig tubtob lima ka tuig.
Sa interview sang Bombo Radyo kay Atty. Will Arceño, OIC sang Provincial Election Supervisor kag Assistant Regional Director sang COMELEC VI, iya ginpahayag nga bangod sa pagpalawig sang termino sang yara nga mga opisyal, indi na pagpadayunon ang mga aktibidad nga nakalista sa una nga calendar of activities para sa BSKE 2026 lakip na ang filing sang certificate of candidacy nga natalana sa lunes.
Suno kay Arceño, kinahanglan nga i-adjust ang mga preparasyon sang COMELEC bangod sa bag-o nga layi kag sa pag-postpone sang eleksyon.
Ginalauman man nga magpagwa ang COMELEC sang bag-o nga schedule kag calendar of activities sa tion nga matigayon ang BSKE sa 2028.
Dugang pa niya, padayon nga ipahibalo sang COMELEC sa publiko ang mga importante nga impormasyon kag mga tikang nga may kaangtanan sa palaabuton nga Barangay kag SK Elections.
