ROXAS CITY – Wala sang may makit-an nga rason ang Provincial COMELEC Supervisor agud i-disqualify ang smartmatic bilang potential bidder para sa 2025 Midterm Automated Election System (AES).
Sa interview sang Bombo Radyo kay Atty. Wil Arceño, ginsiling sini, indi garantiya kun smartatic ang liwat nga magadaug sa bidding bangud sa natabo sang nanliligad nga election.
Mahibaluan nga nagfile sang petisyon sa Commission on Elections (COMELEC) sanday former Information and Communications Technology Secretary Eliseo Rio Jr., former Comelec commissioner Augusto Lagman, former president sang Financial Executives Institute of the Philippines Franklin Ysaac kag retired Colonel Leonardo Odoño agud i-disqualify ang Smartmatic sa 2025 elections bangud sa ginaalegar discrepancies nga natabo sang 2022 national kag local elections.
Suno kay Arceño, ginapunto sang mga petitioners nga may discrepancies sa pagtransmit kag pagreceive sang election returns (ER’s) nagikan sa nagkalain-lain nga precinct padulong sa Comelec’s Transparency Server.
Apang, wala pa na napamatud-an nga may dinayaay nga natabo sang nanligad nga eleksyon gani wala sila sang rason agud i-disqualify ang smartmatic.
