ROXAS CITY – Ginhiwat sang Bureau of Fire Protection (BFP) Capiz ang Command Conference para sa una nga semester subong nga tuig.
Sa interview sang Bombo Radyo kay Supt. Jenny Mae Masip Provincial Fire Marshal sang BFP Capiz ginpahayag sini nga sa nasambit nga kahiwatan, nagdul-ong sang ila mga accomplishements kag mga nabalhag nga mga sunog sa ila banwa ang tagsa ka mga Municipal Fire Marshals, kun sa diin nagnubo ang kaso sang mga nabalhag nga sunog sa probinsya humalin sadtong Enero tubtob Hunyo subong nga tuig ikumparar sadtong 2022, apang nagtaas naman ang danyos nga ginbilin sang mga nagluluntad nga sunog.
Suno kay Masip, nga sa mga nabalhag nga mga sunog masami nga ginatunaan amu ang faulty electrical wiring, mga napabay-an nga mga nakasaksak nga appliances, kag mga napabay-an nga mga nakasindi nga kandila kag mga kalayo sa dapog kung sa diin subong nga bulan sang Hunyo naglab-ot sa 18 tanan ka mga sunog ang nabalhag. Yara naman sa 15 ang structural kun sa diin 13 diri ang residential kag may yara naman sang tatlo ka non-structural.
Sa nasambit nga kahiwatan, ginhatagan man sang pagkilala ang pila ka mga Fire Stations kaangay sang Roxas City Fire station, Dumalag Dumarao, kag Pontevedra municipal fire stations nga nagpangibabaw bangud sa ila dedikasyon sa pagdihon sang pila ka mga inisyatibo sa ila banwa agud mapasangkad ang ila mga programa kag pagserbisyo sa mga pumuluyo.
Ginpahayag man ni Masip nga sa Rehiyon 6, ang probinsya sang Capiz gid lamang ang nagapatigayon sang Command Conference kada tuig.
Sa pihak nga bahin, ginkumpirmar naman ni Masip nga wala sang may nabaton nga bag-o nga fire truck ang probinsya nagikan sa mga ginpanagtag nga 56 ka units sang fire truck halin sa nasyunal.
Apang nagalaum ini nga sa masunod nga pagpanagtag isa na ang Capiz sa mangin resipyente sini bangud 50% sa mga fire trucks sa probinsya ang masobra na sa 25 ka tuig kag nagakadapat na nga bayluhan.
