ROXAS CITY – Magapangatubang sang kaso nga paglapas sa Anti-Trafficking in Persons Act ukon RA 9208 ang nagbugaw kag tag-iya sang KTV bar matapos naaresto sa ginpatigayon nga operasyon sang Women and Children Protection Desk (WCPD) sang Roxas City PNP sa nasambit nga balay kalingawan.
Yara karon sa kostodiya sang pulisya ang bugaw nga si Jonifer Panes alyas Jester Ledesma kag ang tag-iya sang KTV bar nga si Alina Alico sang Barangay 3.
Apang wala lamang madakpan ang isa ka ginaalegar bugaw nga si Nita Arisgado.
Nahibaluan nga na-trauma ang 21-anyos nga commercial sex worker sa inagihan sa kamot sang mga kostomer sini sa ginatrabahuan nga Arellano Bar sa Arellano St., sining syudad.
Sa exclusibo nga interview sang Bombo Radyo Roxas kay alyas Che-Che, gintuad sini nga gintiplang ini sang nagkumbinse sa iya nga si Gester Ledesma nga ginpromesahan sang daku nga sweldo sa iya nga pagtrabaho bilang waitress sa restaurant.
Sa kagustuhan ni Che-Che nga mabuligan ang pamilya kag mapreparahan ang puturo sang anak nga isa ka tuig pa lamang ang edad, nagrisgo ini pinaagi sa pag-upod kay Panes sa paglaum nga daku gid man nga sweldo ang iya pagabatunon kumpara sa ginabaton nga sweldo sa pagtrabaho sini sa Masbate.
Suno kay Che Che nga sa una nga tatlo ka adlaw, nagaserbe lamang ini sa nagakaon kag naga-inum.
Apang sang nagdugay, ginapilit na nga tandugon sang mga kostumer ang pribado nga bahin sang iya lawas nga wala sini ginpahanugutan.
Bangud diri nagasugid ang mga kostumer kay Panes kag ini ang ginaakigan gani wala na ini sang mahimo kundi magsunod na lamang sa luyag sang mga kostumer.
Ginpahayag sini nga wala ini kuntani mag-upod kay Panes kun nahibaluan lamang sini nga mangin isa siya ka commercial sex worker bangud kasubong ginababoy siya sang mga kostumer.
Gindugang pa ni Che Che nga kasubong sa malain nga damgo ang natabo sa iya nga luyag na sini nga malimtan.
Natukiban lamang ang iligal nga operasyon sang Arellano KTV bar sang naglisensiya si alyas Che-Che nga magapakigkita sa isa sini ka kostomer nga nakilala lamang kay Baby Ama nga nagpromesa nga buligan nga makabiya sa amo nga lugar.
