Ginhinyo sang Department of Agriculture (DA) sa Commission on Elections (Comelec) nga i-exempt sa election ban ang baligyaanay sang rice stocks nagikan sa National Food Authority (NFA) sa Local Government Units (LGUs).
Ini ang kadungan sang pagsugod sa pagpaguha sang NFA rice stock sa mga pili nga LGUs.
Sa idalum sang programa, ang mga LGU ang magabakal sang NFA rice stock pinaagi sang Food Terminal Incorporated (FTI) sa P33.00 kada kilo kag mahimo nila ini nga ibaligya sa ila constituents tubtob P35.00 kada kilo.
Mahibaluan nga may 67 LGUs ang nagahayag sang interes nga magbakal sang rice stocks nagikan sa NFA agud makabaligya sang mas barato nga bugas sa ila mga nasakupan.
Sa idalum sang Comelec Resolution 11060, ang pagpaguha, pagpangtan-ay kag paggastos sang public funds para sa social services ang ginadumilian sang 45 diyas antes ang May 12 midterm national kag local elections.
Matandaan una na nga gin-exempt sang Comelec ang mga pili nga social welfare programs sang Department of Social Welfare and Development (DSWD), kalakip ang Pantawid Pamilyang Pilipino Program (4Ps), Ayuda sa Kapos ang Kita Program (AKAP), Walang Gutom Program (WGP), kag Assistance to Individuals in Crisis Situation (AICS), nagikan sa election ban sa idalum sang pila ka kondisyon.
