Gina-finalize na sang Commission on Elections (Comelec) Office-Roxas City ang tanan nga preparasyon para sa masunod nga Barangay and Sangguniang Kabataan Elections (BSKE) 2026.
Sa interview sang Bombo Radyo kay Atty. Rommel Benliro, Roxas City Election Officer, ginpahayag sini nga padayon ang preparasyon sang ila opisina bangud wala pa sang ginpagwa nga hagna ukon advisory ang Comelec nga naga-postpone sang eleksyon.
Suno kay Benliro, ginaplastar na sang ila talatapan ang listahan sang mga mangin kabahin sang Board of Election Inspectors (BEIs), lakip na ang pagtalana sang mga personnel nga ma-assign sa tagsa ka presinto agud masiguro ang malinong nga piniliay.
Nahibaluan nga magasugod ang filing sang Certificate of Candidacy (COC) sa Setyembre 25 tubtob Oktubre 5, 2026 rason nga ginapangabay sang talatapan sa tanan nga nagaplano nga magpapili, ilabi na ang mga re-electionist kag first-time candidates, nga mag-umpisa na sa pagkuha sang ila PSA Certificate of Live Birth bilang kabahin sang kinahanglanon sa pag-file sang COC.
Nagpahanumdom man ang natungdan nga indi na paghulaton ang katapusan nga adlaw antes magproseso sang mga requireements sang mga nagakinahanglan agud malikawan ang pagdinaguso kag pagka-delay sa filing sang candidacy.
