Nagpaandam ang Commission on Population and Development (CPD) sa pagdamo sang mga nagabusong sa mga teenager nga wala pa 15 anyos ang edad, apisar nga naganubo ang kabug-usan nga numero sang mga teenage pregnancy sa Pilipinas.
Suno sa data sang Philippine Statistics Authority (PSA), gikan sa 138,697 ka live births sa mga kababainhan nga naga-edad 10-19 sang 2024, 3,612 ang sa mga dalagita nga mas bata sa 15, gikan sa 3,343 sang 2023.
Ginpahayag ni CPD Undersecretary Lisa Bersales nga samtang padayon nga naganubo ang pagbusong sa tunga sang edad 15-19 bangud sa nagaluntad nga programa sang gobyerno, nagadamo man ang kaso sa mas bataon nga grupo.
Ang mga rason nagalakip sang kaimulon, limitado nga mga oportunidad sa edukasyon, kag temprano nga exposure sa sekswal nga makit-an sa social media.
Ginsambit man ni Bersales ang kinahanglanon para sa mas lokal nga mga interbensyon, lakip na ang pagbinuligay sa mga lokal nga panguluhan kag mga barangay, kag pagpuntirya sa mga pamatan-on sa paagi nga ila mahangpan.
Gina-engganyo niya nga ang mensahe dapat nasentro indi lamang sa sex education kundi sa pagtudlo sa mga kabataan nahanungod sa ila mga handom kag mga katuyuan sa kabuhi.
Dugang pa sini nga importante man ang papel sang mga eskwelahan kag mga manunudlo sa pagtapna sang pagbusong sa mga pamatan-on, kag dapat may yara sang synchronized efforts sa tanan nga LGUs agud masiguro nga ang mga programa mangin tayuyon sa bug-os nga pungsod.
