MANILA, Philippines – Gin-kumpirma sang Committee on Appointments “CA”, sang Miyerkules ang promotion sang lima ka heneral sang Armed Forces of the Philippines “AFP”, matapos madelay sang kapin duha ka semana.
Ang pagkumpirmar sang mga senior military officers una nga nauntat sang Hunyo 1 bangud wala pa sang kompleto nga mga senador nga mapili bilang miyembro sang CA.
Sa ginhiwat nga sesyon, ginpamatud-an sang CA ang mga appointment ni Lieutenant General Edmundo G. Peralta, Vice Admiral Allan M. Javier, Major General Isagani O. Criste, Brigadier General Niceforo M. Diaz Jr., kag Brigadier General Rosemawatte A. Remo.
Antes sini, sa espesyal nga sesyon sang Senado sa idalum sang liderato ni Senate President Sherwin Gatchalian, napilian ang tagsa ka senador nga magarepresentar sa Committee on Appointments kag gilayon nga ginpatawag ang sesyon sang komite.
Lakip sa mga bag-o nga miyembro sang CA amo sanday Senate President Pro Tempore Tito Sotto III, Majority Leader Migz Zubiri, kag senador nga sanday Joel Villanueva, Risa Hontiveros, Raffy Tulfo, JV Ejercito, Loren Legarda, Rodante Marcoleta, Imee Marcos, Bong Go kag Jinggoy Estrada.
Nahibaluan nga luwas sa promotion sang lima ka heneral sang AFP, gin-aprubahan man sang komite ang tatlo ka nominasyon kag 83 ka ad interim appointments sang mga opisyal sang Department of Foreign Affairs.
