ROXAS CITY – Natalana nga magpakigsapol ang Committee on Infrastructure sang Sangguniang Panlungsod sang Roxas City sa G. Arabia Platinum Construction and Development Company agud maresolbar na kag liwat nga mapadayon ang napaiway nga road construction sa San Roque Street, sining siyudad.
Ini ang ginpahayag ni City Councilor Midelo Ocampo, ang vice-chairman sang nasambit nga komitiba sang mainterview sang Bombo Radyo.
Suno kay Ocampo nga posible sa maabot nga adlaw sang Miyerkules, magapakigsapol sila sa nasambit nga kontraktor kaupod ang Department of Public Works and Highways (DPWH) agud mahibaluan kun paano sila makabulig sa liwat nga pagpadayon sang amo nga proyekto.
Isa man ini ka pamaagi suno sa konsehal agud mahibaluan nila kun may iban man nga contractor nga napaslawan nga magsumiter sang nagakaigo nga rekisitos agud makasugod sa isa ka proyekto sandig sa City Ordinance 046-2016.
Matandaan nga ginpauntat sang City Engineer’s Office ang road construction sa San Roque Street kun sa diin nagaserbi nga contractor ang nasambit nga construction company bangud sa ginapahayag kapaslawan nga magsumiter sang tag-iya sang construction permit kag certificate of completion sa mga nakaligad nga proyekto.
Apang matigdas naman nga ginpanindugan sang tag-iya sang amo nga construction company nga si Gin Arabia nga wala siya sang ihibalo natuhoy sa amo nga rekisitos nga kinahanglan masumiter.
Suno diri nga wala man ini ginhambalan antes pa man nagsugod ang konstruksiyon sang nasambit nga proyekto rason nga nagapati siya nga gina-ipit lamang siya sang gobyerno sang siyudad.
