ROXAS CITY – Nagsugod na ang Community Support Program sang 12th Infantry Battalion Philippine Army sa mga lugar nga may yara sang pamahog sang Communist Party of the Philippines- New Peoples Army (CPP-NPA).
Ini ang ginpahayag ni Col. Marion R. Sison, Commander sang 301st Infantry (Bayanihan) Brigade sang mainterview sang Bombo Radyo Roxas.
Suno kay Col. Sison nga makabulig ini agud mas mangin malapit ang gobyerno sa mga tawo.
Tinutuyo sang nasambit nga deployment suno kay Sison amo ang pagpanguna sa pagpatigayun sang programa sang militar kag serbisyo sang gobyerno.
Ginpahayag sini nga nakadeploy naman ang mga katapo sang 12th Infantry Battalion Philippine Army sa banwa sang Tapaz, Capiz agud magbulig sa mga Local Government Unit kag pumuluyo sa pagpalab-ot sang ila problema partikular na sa ginapatigayon nga insurhensya sang mga rebelde nga grupo.
Nagpanawagan man ini sa mga rebelde nga grupo nga magbalik na lamang sa sabak sang gobyerno.
Dugang pa sini nga makabaton man sang livelihood assistance ang regular nga miyembro sang rebelde nga grupo nga magasungka sa mga militar ukon gobyerno.
