ROXAS CITY – Yara lamang sa 80 porsyento ang compliant sa Fisheries Administrative Order (FAO) No. 167-3 sa diin ginapatuman ang closed season para maproteksyunan ang pagpangitlog sang mga isda kasubong sang sardines, herrings kag mackerel sa Visayan sea.
Ini ang ginpahayag ni Mr. Edwin Javier, provincial director sang BFAR-Capiz sang mainterview sang Bombo Radyo.
Suno kay Javier nga kun kaisa indi masustenir ang kampanya bangud may tion nga indi makapadulong sa lawud ang mga law enforcers kag bantay dagat para magpatrolya bangud sa malain nga panahon.
Wala man ginadula ni Javier ang posibilidad nga may iban sa gihapon nga mga mangingisda nga nagapangisda sa ginakabig protected area.
Aminado man ang opisyal nga may nagasulod sa gihapon nga mga isda kasubong sang tabagak kag tuloy sa merkado apang ginklaro nga ini ang gikan sa Bicol region ukon sa mga lugar nga indi sakup sang closed season.
Maidid man ang monitoring sang talatapan agud mahibaluan kun ang mga isda nga nagasulod sa puerto ang gikan sa lugar nga indi sakup sang closed season.
Ginapangitaan sang duha ka mga dokumento ang mga sakayan nga nagadungka sa fishing port kasubong sang Local Transport Permit (LTP) kag Auxilary Invoice nga gina-isyu sang LGU nga ila ginhalinan.
Ginatipon kag gina-validate ini sang talatapan kag ginatsekyar sa natungdan nga mga LGU kun didto gid man naghalin ang mga isda nga ginpasulod sa merkado sa probinsiya sang Capiz.
